خربشات انتخابية

الانتخابات الشغل الشاغل للكل ..!
وهالسنه الحريم عطوهم الحق بالانتخاب
فالعمليه توسعت وصارت أكبر ..

***

باليوم يرن التلفون مرتين وثلاثه ..

تعالوا افتتاح مقر المرشح الفلاني ..

وتعالوا ندوة المرشح العلاني ..

أما الشعارات .. فحدث ولا حرج

لكن صراحة نكتة الانتخابات هالسنه

المرشحة العظيمه .. سين بنت فلان مرشحة الدائرة الخامسه

فصل الدين عن الدولة = مواطنون على قلب وحد ..!!!!

هاا oO

ومن تصريحاتها الهتلريه ..

راح اسعى لمنع المحاكم من تسجيل الزواج من غير الاولى ..!

ومع احترامنا للاسلام .. احنا دولة مدنية ..!

نخيلوها باجر قاعدة يم الطبطائي :)

على قولة الوالد ..

زين في نكتة بهالانتخابات .. :)

***

نداء من الرياسه .. نداء من الرياسه

إعلان إنتخابي صريح ..!

إعلان إنتخابي صريح

لا مستقبل زاهر ولا هم يحزنون

ماراح اريح ولا استريح ..

الا لمن اوصل المجلس ويسموني نائب

واقعد على ذاك الكرسي المريح

وشعار حملتي .. التالي

***

إعلان للشباب الكويتي ..

للي ضايق خلقه ..

للي يبي يتعشى بس ماله خلق يروح بعيد ..

اللي ما عنده اشتراك اي ار تي كاس العالم ..

عشاء مجاني على كيف كيفك ..

بروجكتر عود لمشاهدة المباريات الوديه ومباريات كاس العالم

مشروبات مجانية ..

شيشة في بعض الفروع ..

وضحك وحش ...

في سلسلة مقاهي " خيمة المرشح "

تفضلوا بزيارتنا ..

24/7

***

فكرة ..!

يتلي فكره حلوه :)

بس لو سمحتوا لحد يسويها بدايرتنا ..

لان انا حجزت بالاول ..

الانتخابات اليايه اذا الله احيانا

بنزل وبكل قوتي ..

واحط اعلانات بـ250 دينار مني ومناك

وافتح ديوانية بيتنا مقر انتخابي لي

والعشا سمبوسه وفلافل كل يوم

واحط ايدي على خدي ..

وانطر منو يدفعلي أكثر علشان اتنازل وانحسب ..!!

***

المرشح سين ولد ابيه ..

وصل صوته الفين دينار ..

والحمى بازدياد ..

باقي اكثر من عشرين يوم ووصل الفين .. الله يعلم جم راح يوصل بعدين

تبون تعرفونه ... ماراح تلقونه بسوق " بو اميه " ولا حتى بسوق" بوخمسين"

اعتقد عرفتوه

***

مرشح آخر موديل ..

يدفع فواتير الشباب

يبدل تواير سياراتهم ..

اشتراكات كاس العالم ..

من مرشح آخر موديل ..

سارع قبل نفاد الكمية ..!